Browsing by Author "Chang, Ping-Sheng"

Filter results by typing the first few letters
Now showing 1 - 1 of 1
  • No Thumbnail Available
    Item
    對鶯歌瓷仔用語來探討台灣常民文化
    (2009) 林聰明; Lin,Tsung-Ming
    本研究是欲針對瓷仔用語來成做題材，尤其鶯歌的瓷仔是全國有名，甚且佇咧國際上仝款是名聲足響，毋過uì過去到現在，差不多有兩百外年的燒窯歷史，嘛留下足濟值得探討的常民文化現象，常民一般攏是「食飯皇帝大」，毋過鶯歌人卻是「燒瓷食缺」，到底這是為什麼呢？鶯歌大約佇咧60到80年代左右，拄著建築業的全盛時期，鶯歌差不多有二百外支的煙筒管，會使講是「點塗成金」的瓷仔工場，定定攏有建築業的頭家，手中是捾（kuānn）貯現金的007皮箱，徛佇咧磅空窯的門口排規排，咧等タイル（thài-luh）出窯，等到出窯的時陣，就一手交貨一手付現金，彼是因為建築業的厝起好了後，若是タイル抑袂貼好勢，這是無法度將厝交予客戶，建築業的頭家當然嘛無法度來收尾款，所來造成的一種文化現象啦。其實佇咧台灣鼓勵外銷的年代，鶯歌咧過程中扮演了𤆬(tshuā)路雞的角色，只是一个小小的鄉鎮，煞會當將世界上各種包羅萬象的瓷仔，攏集中佇咧鶯歌來生產發展，是一種予人感覺真不可思議的代誌；若是踮佇臺灣北部的鄉鎮，尤其是蹛佇台北地區附近，攏會聽著老一輩長期流傳著一句話，「鶯歌窟、有入無出，鶯歌的塗足黏人」的講法，閣有外鄉鎮的鄉親，看著鶯歌人遮爾仔好趁食，攏會用話共鶯歌人消遣講：「恁干焦塗攪水，一箍著欲趁人九角幾，趁錢是若趁水，講鶯歌人是敢若土匪」，毋過其中到底是有什麼製作過程佮辛苦呢？外鄉鎮的人是攏總毋知影，干焦看著結果是甜的；足濟類似這款的瓷仔用語佇咧民間流傳，所以筆者希望透過本研究，想欲進一步去探討鶯歌瓷仔的用語，到底是按怎來形成、變化，煞進一步融入去普羅大眾的潛意識內底呢？然後閣會當表現佇民間故事佮傳說當中，又閣是經歷了啥物款過程的瓷仔用語，以及啥物工具的瓷仔用語，會當產生這款常民的瓷仔用語呢？所進一步營造出來的台灣常民文化，也是本文欲討論的重點。佇咧研究瓷仔用語的同時，首先愛面對的是瓷仔工作者，也是這種自然流傳的民間用語、佮傳說的記錄者和傳播者，是攏按怎處理瓷仔用語，當然瓷仔的作品，才是逐个瓷仔工作者欲表現的領域，毋過大多數是攏無受過正規瓷仔學校教育的工作者，佇咧這款常民文化的背景之下，筆者進一步去共瓷仔工作者來收集、記錄、了解，然後來探討其中的文化意涵，是按怎會來傳播和流傳一寡台語的瓷仔用語呢？最後佇咧臺灣的常民文化當中，鶯歌的瓷仔用語，是用啥物款的角色佮詩歌模式自然呈現出來啦！